Act 3 | ASO | STEP | Gamene ma Petoloki Zohaneki nivenga' gamene tili kilokulo' nene O'mosola laa' ani' gamene ogavo mono' numuno nabau' dizilisa nivasivo

Acts 3

Mono' Numuno Naba'mi Gatedo' Ve Gebili Ma Di Lamine' I-dasine' Gamazi

1 Gamene ma Petoloki Zohaneki nivenga' gamene tili kilokulo' nene O'mosola laa' ani' gamene ogavo mono' numuno nabau' dizilisa nivasivo 2 ve ma izelehi mulunouti' gebili soto' ive nene mono' numuno ne'mi gateni ado' lamine' goloso neive laa' ani' gatenilo' nene gamene gamene ele'mizi di huli-dikevo a'mido' mino evene' dizi limi ave nene monimu' voku' voku' lo-ngedo minaa' ine' ve. 3 Petoloki Zohaneki mono' numuno nabau' dizilisa nivasivo ningo monimu' voku' lo-ngidine'. 4 Voku' lo-ngedavo Petoloki Zohaneki vonu' bili Petolo' ti' lo lo-imine': Vonu' lebelezo. 5 Ti' lo lo-emavo ve gebili aza giline' nene inite' ma nemelesa lihe lo vonu' ngibiline'. 6 Ne'mino neivo Petolo' ti' lo lo-imine': Nezela moni heneni'ne nomine'za inite' hamo' ma neine' nene gemekuvo dalosane. Nasalete ve Izesu' Kilisito' ei' velemu' lo-gemekuvo oto aka monezo. 7 Ne'mine lo-emo ana zamela do do ote-davo lite' lo gizene luhisesi omuvosi amuzo molavo 8 lite' lo ote pehe lo aka mono oluto' dize dize' ogo mono O'moso opo'ni nolivo engikisi mono' numungu' maka' dizani'. 9 Dizikevo aka nomono O'moso opo'ni nolivo evene' muki' ningi 10 gateni lamineku' mino monimu' voku' voku' lo-ledo minaa' ive ma neive li gilii lamine' ingumu' sizaga li geke' li-dani' ve.

Petolo' Mono' Numuno Nabau' Mino Gamazi Lo-ngimine' Gamazi

11 A'mine di lamine' i-dasive nene Petoloki Zohaneki engita vo gi'mizo neivo evene' muki' ningi mono' numuno neu' he' numuno naba gizikani' gulive Solomoni' ve langu' nene loti' izi vi di gese' igi ve'ine gahava nomivo minani'. 12 Petolo' evene' ningo ti' lo lo-ngimine': Isilaele' alevekizo, ve mene ningi sizaga goloso nilani' nene leli' amuzotedunu' nomive. Ido' leli' laminetemu' ogo ma do lamine' o-damusive. Nemu' vonu' vonu' libilamilo. 13 O'moso ado' avotemote Abalahamule Isakale Zakobole ido' avotemote muki' gelekele' i-daa' ave nene aza gipele Izesu' gulive do hozi lo amuzo've do soto' ogavo niningave. A'mine ve Izesu'ni nene lingine guvelesi ve Pilato' anau' ele'mizi milikevo Pilato' aza iseve ize-delove lo nolivo lingine Pilato' velelo' mehedine imi belelive lani'. 14 Ee, a'mine lulo laminekisi ve lisihe' lamine' nene ezemu' gosele' lengebelavo o've li-di evene' bele hilive ma gomukuti' nalato' neivo lingine Pilato' iseve ize-davo a'mine evene' bele hilive lezesi minelone lani'. 15 Ne'mine igi minevo' alevo' ne'mi melehine bili hilani' ve. Bili hilani'za O'moso'mo hilinguti' do ote-dine'. Ido' do ote-dine' nene la'lisete ninge none' ma ve. 16 Izesu' gulivelo' gele ele'vole' ogo minosa ningaa' ave mene do lamine' o-dusivo aza Izesu'nimu' gele ele'vole' idi'mo lamine' ine' ve. 17 Zogone zuhokizo, linginesi gizebo vetinesi Izesu'ni i-dani' nene gili lamine' ami ladani igi minani' nemu' i-dani' ne gele nouve. 18 Do lu' izelive lo O'moso'mo imiselelesa live mene aza mulumo gelo heleleseive lo O'moso'mo line' gamazi ado' polohete mukilite li soto' ikeni' gamazi nene ne'mine ogo do gihile ize-dave. 19 O'moso'mo lihimetine gilite-lengedelingumu' ve li lutine di velepe' izi goloso nitetine hulilo. 20 Ne'mine ikevo O'moso'mo hongu lo lamine' minaa' nene do soto' o-lengedo do lungu' izelive lo imiselelove lo lo huko salani molo-lidive nene lengita imiseleleseive. A'mine do lu' izelive nene Izesu' ma ve. 21 Eze nene Okulumoli'mo asabu' o-davo a'mida mineline' ogave. Mino O'moso'mo inite' mata' do gosoho' iline' gamene nene alitavo ma tine' molo aloseive. A'mine gamenemu' nene O'moso'mo gamazi've ve'ningu' molavo gozopo' aka'milati' ei' polohete've kekeize li minani' nete li soto' ani' ve. 22 Ido' Mose' aza gamazi ma ti' lo line':

Guvetinesi ve O'moso aza lengi' zuhouti' ve ma
eze gamazi lo soto' ilive polohete neni' ne'mine do ote-do hulo-lengedeleseive.
A'mine veli'mo gamazi lo-lengemeline' nene gili dalo.
23 Ido' a'mine polohete'mo liline' gamazilo' ve mali'mo gele damiline' nene
bilikevo O'moso'mi evenele zuhou' minamo osu' lilive lo line'.
24 Ee, gamazi li soto' igi minani' polohete ado' Samuvelikisi ido' ezeloti' alinge' milavesi muki' idise mene gamenemu' li soto' ani'. 25 Lingine polohete minaveti gize'nido' lisi nimonaze. O'moso'mo avotingine gamazi lo huko lo-ngimine' nene linginemukisi line' ma ve. Nemu' neve Abalahamu'ni ti' lo lo-imine': Ga'vopilemo' ma misubou' zuho ato ato' nene no'noho' ize-ngedeleseive lo line'. 26 Gana' Zuda ve lengikumu' ve lo gipele do ote-do imiselavo lingine goloso nite' di'mi vi minanguti' nene lengi' hamo' hamo' do ti'ne-lengedo no'noho' ize-lingidine' ve.